本地品牌KidsLogic炮製嘅Q版5小強，高質素造型獲Yamato賞識，仲攞埋東映官方授權，殺返日本市場轉頭，就連原作者車田正美都話要番一Set，風頭之勁所向披靡。今屆動漫節唔止有齊5子，仲有18K金星矢及車田叔嘅簽名版壓場，認真架勢堂！
Q版5小強嘅製作者Ray
Wong，係一個《星矢》嘅80後粉絲，自言冇諗今次作品會令車田叔愛不釋手。佢早喺13歲就入行做首辦，讀書時代主修設計及舞台道具：「我係由1998年參加香港比例會情景比賽獲獎而入行，當時已經好崇拜有份製作《E.T.》、《侏羅紀公園》等猛片嘅荷里活電影道具大師Stan
Winston。」多年來累積嘅首辦雕功，後來獲得本地某知名Figure生產商垂青，操刀炮製《Predaror
2》Figure，功力之高可想而知。
紫龍面相玩足3個月
一次機緣巧合下，阿Ray認識咗KidsLogic嘅創辦人，兩個大細路傾起星矢就雞啄唔斷，阿Ray話：「我自己一直好沉迷《星矢》，KidsLogic又打算製作嚴肅款嘅Q版公仔，於是一拍即合，誕生咗呢個Cosmo
Burning系列。」阿Ray唔想脫離動畫設定，又唔希望製成品「萌味」太重，製作頭炮紫龍時，淨係頭雕表情就揣摩咗3個幾月。「好彩東映及車田先生都順利收貨，而且知道車田先生好鍾意我嘅構思，自己都好感動，好似同偶像歌手同場演出咁興奮。」
一輝阿瞬率先發售
繼紫龍、星矢、冰河之後，一輝及阿瞬將於今年動漫節率先發售，5子之中，阿Ray最鍾意係美男子冰河：「佢個樣係最優雅，製作時都要分外仔細，務求忠於原著神髓，最後外間嘅反應都幾好。」至於最難處理就係配色複雜嘅一輝：「因為要兼顧聖衣腳部嘅拉花紋理，唔想逼埋一齊有礙觀瞻，而且一輝要有殺氣，表情又要夠兇狠。」5小強喺內地大量生產嘅上色部分，阿Ray都要親自配色指導，難怪質素拍得住「日本製造」啦，可謂「英雄莫問出處」！
青銅終極聖衣 天馬座 星矢
青銅終極聖衣白鳥座 冰河
青銅終極聖衣 天龍座 紫龍
青銅終極聖衣 仙女座 阿瞬
青銅終極聖衣 鳳凰座 一輝
每款人物都有磁鐵台座，加埋LED燈圍邊，而且發光顏色款款唔同。
造型師Ray Wong已積極籌備12宮黃金聖衣系列，寄望今年第三季可以公布試版。
會場限定版
天馬座星矢25周年
特別版$1,986
全身聖衣用18K金打造，限量發行100盒，其中10盒仲有車田正美親筆簽名，抽唔抽中就睇彩數喇！
天馬座飛翼星矢$300
加入新設計飛翼，全身聖衣仲有電鍍上色。
