我當年會考的心情係有兩次，因為我曾經中五重考，因此考咗兩年會考，所以心情有兩次。第一次知道自己衰咗，咩都無諗，一晚瞓到大天光，煮到呢就食，結果第一次得7分，第二次，知恥近乎勇，勁讀，到咗放榜果日，又係咩都唔諗，煮到呢又係照食，覺得自己盡咗力就算。番去攞會考成績果日真係好似拍戲咁，攞果日塞車遲大到，番到去學校，好多同學已經攞咗會考成績單，我番到學校走廊有個肥仔同學同我握手，話恭喜我呀，我有21分，我話佢都發神經既(後加一句粗口，唔出得街)，入到課室，得三份二同學，有喊有笑，派果個班主任對住我笑，話我攞到好好成績播，我唔信，我覺得個班主任玩嘢，因為我平時都成日玩佢，跟住我慢慢打開張會考成績單，班同學就好似一擲千金班觀眾咁，話打開佢，打開佢，結果我好似周星馳賭聖卒牌咁，慢慢卒，結果真係21分，跟住就有好多同學上前恭喜我，各位網上面朋友，你話我會考放榜的經歷似唔似拍戲。但係後來我打電話比一早知道我有21分的肥仔同學，問佢點解會知我有21分，原來係成班同學一早知道，因為我果日遲大到，班主任以為我唔番呢攞，俾咗張成績單比一個我最好的同學，後來個同學係學校用學校個電話打俾我阿媽，我阿媽話我會番嚟攞會考成績單，我阿媽話可能我遲到，個位我最好的同學出賣我，佢講俾全班同學知，跟住俾番張成績單比班主任，所以班主任同成班同學一早知道我有21分。
